Welcome to FMHACA

በመግቢያና መውጪያ ኬላ የጤና ቁጥጥር ላይ ከባለድርሻ አካላት ጋር የምክክር መድረክ ተካሄደ፡፡

የኢትዮጵያ የምግብ፣ የመድኃኒትና የጤና ክብካቤ አስተዳደርና ቁጥጥር ባለሥልጣን የቅርንጫፍ ጽ/ቤቶች ማስተባበሪያ ጽ/ቤት እና የደቡብ ኢትዮጵያ ቅርንጫፍ ጽ/ቤት በጋራ ያዘጋጁት በመግቢያና መውጪያ ኬላ የጤና ቁጥጥር ላይ የባለድርሻ አካላት መድረክ በሻሸመኔ ከተማ ከመስከረም 12-13 ቀን 2009 ዓ.ም ተካሄደ:: የምክክር መድረኩ ከደቡብ ብሔር ብሔረሰቦችና ሕዝቦች፣ ከኦሮሚያ ክልል እና ከሞያሌ መግቢና መውጪያ ኬላ ከተውጣጡ የባለድርሻ አካላት ጋር የተካሄደ ሲሆን ከገቢዎችና ጉምሩክ፣ ከፌዴራል ፖሊስ፣ ከፍትህ፣ ከንግድ ቢሮ፣ ከንግድ ውድድርና ሸማቾች ጥበቃ እና ከግል ጤና ተቋማት ማኅበር የተወከሉ ተሳታፊዎች ተገኝተዋል::

 

ተሳታፊዎች በምክክር መድረኩ ላይ

የባለሥልጣን መሥሪያ ቤቱ ም/ዋና ዳይሬክተር ዶክተር ከይረዲን ረዲ የምክክር መድረኩን ሲከፍቱ እንደተናገሩት በመግቢያና መውጪያ ኬላዎች ላይ ያለውን ቁጥጥር ለማጠናከር ከባለድርሻ አካላት ጋር መሥራት ወሳኝ መሆኑን ገልጸዋል:: አያይዘውም ሕገወጥ የምግብና የመድኃኒት ምርቶችን እና ድንበር ዘለል ተላላፊ በሽታዎችን ለመከላከል በኬላዎች ላይ ጥብቅ ቁጥጥር መኖር እንዳለበት አፅንኦት ሰጥተው ተናግረዋል::
በምክክር መድረኩ ላይ የዓለም አቀፍ የጤና መመሪያ፣ የአለም ዓቀፍ የጤና መመሪያ አተገባበር እና ሕገወጥ የምግብና የመድኃኒት ንግድ የሚሉ ሰነዶች ለውይይት የቀረቡ ሲሆን ከተሳታፊዎች በመግቢያና መውጪያ ኬላዎች ቁጥጥር ላይ በሚታዩ ችግሮችና የመፍትሄ ሃሳቦች ላይ በርካታ አስተያየቶችና ጥያቄዎች ተነስተዋል::
ለተነሱ አስተያየቶችም ሆነ ጥያቄዎች በቂ ምላሽ የተሰጠባቸው ሲሆን ሁሉም ባለድርሻ አካላት የሚመለከታቸውን የቤት ሥራ ወስደው እንዲሰሩና በቀጣይ ስድስት ወር አፈጻጸሙን ለመገምገም ተመሳሳይ መድረክ እንደሚኖር ማሳሰቢያ ተሰጥቷል::
መሰል የባለድርሻ አካላት መድረክ በየስድስት ወር የሚካሄድ ሲሆን ባለፉት ሁለት ዓመታት ግን በተለያዩ ምክንያቶች ሳይካሄዱ እንደቀሩ እና አሁን ግን ተጠናክሮ እየቀጠለ መሆኑ ተገልጿል:: በቅርቡም በአክሱም÷ ሐረር እና ደሴ ከተሞች ላይ በመግቢያና መውጪያ ኬላ የጤና ቁጥጥር ላይ የባለድርሻ አካላት መድረክ እንደተካሄደ ከአዘጋጆቹ ለማወቅ ተችሏል:

Comments / Feedback  •   • 

Note: To view, save/download, or print the following files, you must have Adobe Acrobat Reader installed on your computer.
Click here to download Adobe Acrobat Reader.