Welcome to FMHACA

600,872,603.91 ብር የሚገመት ጥራት እና ደህንነታቸው ያልተጠበቀ መድኃኒት፣ የህክምና መሳሪያዎች ፣ የጽዳት እና የመዋቢያ እቃዎች በባለሥልጣኑ መሥሪያቤት እንዲወገዱ ተደረገ፡፡

 

የኢትዮጵያ የምግብ፣ የመድኃኒትና የጤና ክብካቤ አስተዳደርና ቁጥጥር ባለሥልጣን በ2009 በጀት ዓመት ባደረገው ቁጥጥር 600,872,603.91 ብር የሚገመት ጥራት እና ደህንነታቸው ያልተጠበቀ መድኃኒት፣ የህክምና መሣሪያዎች የጽዳት እና የመዋቢያ እቃዎች እንዲሁም 3227 ቶን የተበላሸና የአገልግሎት ዘመኑ ያለፈ ምግብና የምግብ ጥሬ እቃዎች በባለሥልጣኑ መሥሪያቤት እንዲወገዱ ተደርጓል፡፡

በሕገወጦች ሲዘዋወር የተያዘ መድኃኒት

የባለሥልጣን መሥሪያቤቱ የ2009 በጀት ዓመት አፈጻጸም ግምገማ ባደረገበት ወቅት የተገኙት የባለሥልጣን መሥሪያቤቱ የኢንስፔክሽን እና ፈቃድ ምክትል ዋና ዳይሬክተር ወ/ሪ ሄራን ገርባ እንደገለጹት ደህንነታቸውና ጥራታቸው እንዲሁም ፈዋሽነታቸው ያልተረጋገጡ የጤና ግብአቶች እና አገልግሎቶች በህዝብ ላይ ጉዳት ሳያደርሱ በመቆጣጠር ማስወገድ የተቻለው   የሕዝብ ክንፍ እና የባለድርሻ አካላት ተሳትፎ እየጨመረ በመምጣቱ መሆኑ የተገለጸ ሲሆን አሁንም ያለውን አቅም አሟጦ መጠቀም እንደሚያስፈልግ በመግለጽ ብዙ መሠራት ያለባቸው ሥራዎች  እንዳሉ አሳስበዋል፡፡

በመግቢያና መውጫ ኬላዎች እና በድህረ ገበያ ጥናት የተደረሰባቸው በቁጥጥር ሥር እንዲውሉ በማድረግ ተገቢውን እርምጃ መውሰድ መቻሉ አበረታች መሆኑ የተገለጸ ሲሆን፤ አነዚህም በቁጥጥር ስር የዋሉ የጤና ግብአቶችን እንዲወገዱ እና ወደ መጡበት አገር እንዲመለሱ ተደርጓል፡፡

በቀጣይ እነዚህን የህገወጥ የምግብ የመድኃኒት እና የጤና አገልግሎቶች እንዲሁም ግብአቶችን ለመቆጣጠር በሚደረገው ጥረት ሕዝባችን የተለመደውን ትብብር እንዲያደርግ የተጠየቀ ሲሆን፤ በተለይ የህገወጥ የጤና ግብአት እና አገልግሎት ሲያጋጥም በአቅራቢያ ለሚገኝ የጤና ተቆጣጣሪ፣ በአቅራቢያ ለሚገኝ የፍትህ አካል ወይም በፌዴራል ደረጃ ለባለሥልጣን መሥሪያቤቱ በነጻ የስልክ መስመር 8482 ማሳወቅ እንደሚገባ የተገለጸ ሲሆን፤ ደህንነቱ የተረጋገጠ የምግብ የመድኃኒት እና የጤና አገልግሎት እንዲኖር ማድረግ የሁላችንም ጉዳይ መሆኑ ይታወቃል፡፡

 

 

Comments / Feedback  •   • 

Note: To view, save/download, or print the following files, you must have Adobe Acrobat Reader installed on your computer.
Click here to download Adobe Acrobat Reader.